Home பயணம் மனதைக் கவரும் மாலத்தீவு

மனதைக் கவரும் மாலத்தீவு

241
0

உலகிலேயே தட்டையான நாடு என்ற புகழுக்குரிய மிக அழகிய பல சிறிய தீவுகளால் ஆன நாடு தான் மாலத் தீவு. சுமார் 1,190 தீவுகளைக் கொண்ட ஒரு நாடு இது. இவற்றில் 200 தீவுகளில் மட்டுமே மக்கள் வாழ்கிறார்கள். இந்த நாட்டின் மக்கள் தொகையும் ரொம்ப அதிகமில்லை. மொத்தமே சுமார் 4 லட்சம்தான்.

அழகான மணல் வெளிகள், தென்னைமரங்கள், அமைதி பூங்காவை திகழும் சூழல் இப்படி வர்ணனை செய்து கொண்டே போகலாம், அப்படி ஒரு அழகான இடமாக இது திகழ்கிறது.

மக்கள் தொகை பட்டியலின்படி உலகின் குட்டி நாடு. ஆனால், அழகான நாடுகளில் இதுவும் ஒன்று. இங்கே உள்ள தீவுகளில் 26 தீவுகள் பவளப்பாறைகளால் உருவானது. இவை மாலை போல் தீவுகளை இணைத்திருக்கின்றன.

ராடன் எனப்படும் ராஜாக்களாலும், ராணின் எனப்படும் ராணிகளாலும் மிகவும் பண்டைய காலத்திலிருந்தே மாலத்தீவு ஆளப்பட்டு வந்துள்ளது. இந்தியப் பெருங்கடலின் முக்கியமான கடல் பாதையில் இத்தீவு அமைந்துள்ளதால் வரலாற்று ரீதியாக முக்கியத்துவம் பெற்று வந்துள்ளது.

இந்தியாவும் இலங்கையும் மாலத்தீவின் அண்டை நாடுகளாக இருக்கின்றன. இவ்விரு நாடுகளும் பல நூற்றாண்டுகளாக மாலத்தீவுடன் நெருங்கிய கலாச்சார மற்றும் பொருளாதாரத் தொடர்பு கொண்டுள்ளன. பலகறை சங்கு என்ப்படும் கடல் பொருள் மாலத்தீவுகளுக்கு முக்கிய ஆதாரமாக விளங்கியுள்ளது.

பண்டைய இந்தியாவில் அரசாண்ட கலிங்கர்களின் தாக்கம் இத்தீவில் அதிகமாகக் காணப்படுகிறது. இவர்களே கடல் வழியாக இலங்கை மற்றும் மாலத்தீவுகளுக்கு வியாபாரத்திற்காக வந்துள்ளனர். தவிர பௌத்த மதத்தையும் இத்தீவில் பரப்புவதற்கும் காரணமாக இருந்துள்ளனர்.

அண்டையிலுள்ள இந்தியத் துணைக் கண்டத்தின் தெற்கு கடற்கரைப் பகுதியில் இருந்து மாலத்தீவுக்கு முதன்முதலாக வந்து குடியேறியுள்ளனர். மாலத்தீவினரின் வாய்மொழிச் செய்திகள், மொழியியல் மற்றும் கலாச்சார மரபு மற்றும் சுங்கத்துறை நடவடிக்கைகள் முதலியனவற்றின் ஒப்பீட்டு ஆய்வு முடிவுகள் இக்கருத்துக்கு ஆதாரங்களாக உள்ளன.

குட்டி நாடாக இருந்தாலும் இந்த நாட்டுக்குத் தனிப் பாரம்பரியம் உள்ளது. நம் சோழ மன்னர்கள் காலத்தில் இந்தத் தீவு அவர்களின் ஆட்சியின் கீழ் இருந்தது.

1558-ம் ஆண்டில் போர்த்துக்கீசியர் இந்தத் தீவு தேசத்தைக் கைப்பற்றினார்கள். அந்தக் காலத்தில் பல ஐரோப்பிய நாடுகள் நாடு பிடிக்கும் போட்டியில் தீவிரமாக இருந்தன. இதன் காரணமாக 1654-ம் ஆண்டு முதல் டச்சுக்காரர்கள் வசமும், 1887 முதல் ஆங்கிலேயர்களிடமும் இந்த நாடு அடிமைப்பட்டது.

இறுதியாக 1965-ம் ஆண்டில் ஆங்கிலேயர்களிடமிருந்து இந்தக் குட்டி நாடு விடுதலை பெற்றது. மாலத் தீவுகள் நாடு சுற்றுலாவை நம்பித்தான் இருக்கிறது. உலக வெப்பமயமாதல் காரணமாகக் கடல் மட்டம் உயர்ந்தால், கடலில் மூழ்கும் முதல் நாடு இதுவாகத்தான் இருக்கும்.

இதை உணர்த்துவதற்காக 2009-ம் ஆண்டில் அந்த நாட்டின் அமைச்சரவைக் கூட்டம் கடலுக்கடியில் நடைபெற்றது.

Advertisements

Leave a Reply